Asosiy qismga o‘tish

Mendora ilovasining maxfiylik siyosati

Kuchga kirish sanasi: 12.11.2026 · versiya 1

1. Biz kimmiz

Ushbu siyosat Android uchun Mendora ilovasida (Google Play, tech.mendora.app) va ilovaga kirishda ishlatiladigan Mendora Telegram botida shaxsiy ma’lumotlaringiz qanday qayta ishlanishini tushuntiradi.

  • Operator: "NEXT US" mas’uliyati cheklangan jamiyati (NEXT US LLC), STIR 313 165 293, IT Park rezidenti.
  • Manzil: O‘zbekiston, Sirdaryo viloyati, Paxtaobod, Xalqobod MFY, Chinor ko‘chasi, 67-uy, 120500.
  • Aloqa: team@mendora.tech.

Qayta ishlash O‘zbekiston Respublikasining "Shaxsga doir ma’lumotlar to‘g‘risida"gi Qonuni (2019-yil 2-iyul, O‘RQ-547) va boshqa qonun hujjatlariga muvofiq amalga oshiriladi. mendora.tech saytining o‘z maxfiylik siyosati bor.

2. Qanday ma’lumot yig‘amiz

Hisob va kirish (Telegram orqali)

  • Telegram identifikatoringiz, Telegram’dagi ismingiz va foydalanuvchi nomingiz (username).
  • Telefon raqamingiz. Uni botda "Raqamni ulashish" tugmasini bosib o‘zingiz yuborasiz. Raqam faqat o‘zingizniki bo‘lsa qabul qilinadi.
  • Ilova parol so‘ramaydi.

Profil

  • Ilovadagi rolingiz: talaba, o‘quvchi, o‘qituvchi yoki maktab.
  • Ilova tili.
  • Rolingizga qarab: OTM, fakultet va kurs; yoki maktab, sinf (5–11) va fan.
  • Ba’zi maydonlarni bo‘sh qoldirish mumkin.

Qurilma

  • Ilovaning o‘zi yaratgan tasodifiy qurilma identifikatori.
  • Telefon modeli kodi, masalan "SM-A155F".
  • Platforma va ilova versiyasi.

Bular kirishda va kirish kalitini yangilashda yuboriladi. Ularning maqsadi hisobingizni himoya qilish va "qurilmalarim" ro‘yxatini ko‘rsatish.

Siz kiritadigan kontent

  • Buyurtma matnlari: mavzu, fan, til, savollarga javoblaringiz, reja bo‘yicha o‘zgartirishlar. CV yoki motivatsion xat kabi xizmatlarda o‘zingiz yozgan shaxsiy ma’lumotlar (ism, ta’lim, yutuqlar) ham shunga kiradi.
  • Masala rasmi. "Masala yechimi" xizmatida kamera yoki galereyadan tanlagan rasmingiz serverda qayta ishlanadi: kichraytiriladi, qayta saqlanadi, joylashuv (GPS) va boshqa metama’lumotlar o‘chiriladi.
  • DTM va Milliy sertifikat mashqlaridagi javoblaringiz, vaqt va ballar.
  • Jonli o‘yinda yozgan ismingiz va javoblaringiz. Hisobsiz qo‘shilgan o‘quvchilar uchun ham shu ma’lumotlar saqlanadi.
  • AI natijasi haqida yuborgan shikoyatingiz matni.
  • O‘zingiz yaratgan taqdimotning ochiq havolasi, agar uni ulashsangiz.

Buyurtmalar va to‘lovlar tarixi

  • Buyurtmalar, ularning holati va tayyor fayllar.
  • Hisobingizdagi balans va operatsiyalar tarixi.
  • Karta raqami va karta ma’lumotlari bizga kelmaydi.

Texnik loglar

  • Serverga so‘rov yuborilganda IP manzil, vaqt va so‘rov turi xavfsizlik va nosozliklarni topish uchun yoziladi.

Yig‘maydigan ma’lumotlarimiz

  • joylashuv;
  • kontaktlar ro‘yxati;
  • SMS va qo‘ng‘iroqlar;
  • reklama identifikatori;
  • ilovadan foydalanish analitikasi va crash hisobotlari, chunki ilovada bunday SDK yo‘q;
  • mikrofon yozuvlari;
  • telefoningizdagi boshqa fayllar.

Ilovada reklama yo‘q.

3. Ma’lumotlardan nima uchun foydalanamiz

  • Hisob yuritish: hisob ochish, unga kirish va uni himoya qilish.
  • Xizmat ko‘rsatish: buyurtmani bajarish, natijani ko‘rsatish va yuklab olishga berish.
  • Bilim faoliyati: DTM mashqlari va o‘yinlarni ishlatish, natijalarni saqlash.
  • Xabarlar: Telegram bot orqali buyurtma tayyor bo‘lgani haqida xabar yuborish.
  • To‘lovlar: to‘lovlarni hisobga olish, qaytarishlar va qonun talab qiladigan buxgalteriya ishlari.
  • Xavfsizlik va moderatsiya: suiiste’mol va firibgarlikni aniqlash, shikoyatlarni ko‘rib chiqish, AI natijalari va o‘yin ismlarini nazorat qilish.

Huquqiy asoslar:

  • siz bilan tuzilgan shartnoma (foydalanish shartlari va ommaviy oferta);
  • qonun talablari;
  • sizning roziligingiz.

Roziligingizni istalgan vaqtda qaytarib olishingiz mumkin. Buning uchun hisobni o‘chirasiz yoki bizga yozasiz.

Ma’lumotlaringizni sotmaymiz. Ularni reklama uchun ham ishlatmaymiz.

4. Sun’iy intellekt (AI) bilan qayta ishlash

Buyurtmani bajarish uchun buyurtma matni, masala rasmi yoki DTM xatolaringiz sun’iy intellekt provayderiga yuboriladi. Hozirgi provayderlar:

  • Matn va rasmni tushunish (Claude modellari):
    • Anthropic API (Anthropic PBC, AQSh);
    • zaxira yo‘li sifatida Runware xizmati;
    • Amazon Web Services’dagi Amazon Bedrock, Yevropa Ittifoqi hududlarida.
  • Taqdimot rasmlari: ba’zi dizayn uslublarida taqdimotga 3 tagacha rasm chiziladi. Rasm modeliga faqat mavzu asosida tuzilgan qisqa tavsif yuboriladi. Shaxsiy ma’lumotingiz yuborilmaydi.

Provayderlarga xizmat uchun kerak bo‘lgan qismgina yuboriladi. Telefon raqamingiz, Telegram identifikatoringiz va to‘lov ma’lumotlaringiz yuborilmaydi. Har bir AI chaqiruvi bizda provayder, model, hajm va narx bo‘yicha qayd etiladi. Bu qaydda maxfiy kalitlar va matnning o‘zi saqlanmaydi.

AI natijasi qoralama va o‘quv yordamchisi hisoblanadi. Unda xato bo‘lishi mumkin, shuning uchun uni o‘zingiz tekshirib, tahrir qilishingiz kerak. Har bir AI natijasida "Shikoyat qilish" tugmasi bor. Shikoyatlarni ko‘rib chiqamiz va filtrlarimizni yaxshilashda ishlatamiz.

5. Ma’lumotlar qayerda saqlanadi

Ma’lumotlar Amazon Web Services serverlarida, Frankfurt (Germaniya, eu-central-1) hududida saqlanadi. Demak, ular O‘zbekiston Respublikasi hududidan tashqarida saqlanadi va biz bu haqda shu yerda xabar beramiz.

AI provayderlari ma’lumotni AQSh yoki Yevropa Ittifoqida qayta ishlashi mumkin. Telegram esa bot orqali yozishmalarni o‘z serverlarida qayta ishlaydi.

Server bilan aloqa HTTPS orqali shifrlangan. Kirish kaliti telefoningizda Android Keystore yordamida shifrlangan holda saqlanadi.

6. Ma’lumot kimlarga beriladi

Ma’lumot faqat xizmatni ko‘rsatishga kerak bo‘lgan ishonchli ijrochilarga va faqat kerakli hajmda beriladi:

  • hosting: Amazon Web Services;
  • AI provayderlari (4-bo‘lim);
  • Telegram, kirish va xabarlar uchun;
  • to‘lov tizimi (12-bo‘lim).

Qonunda ko‘rsatilgan hollarda ma’lumot vakolatli davlat organlariga ularning qonuniy so‘rovi bo‘yicha beriladi.

Jonli o‘yinda yozgan ismingizni o‘yinni o‘tkazayotgan o‘qituvchi va o‘yin ishtirokchilari ko‘radi.

7. Qancha vaqt saqlanadi

  • Hisob, profil, buyurtmalar va natijalar: hisobingizni o‘chirguningizcha.
  • Masala rasmlari: 30 kun, keyin avtomatik o‘chiriladi.
  • Ilova bildirishnomalari: 180 kun.
  • Taqdimotning ochiq havolasi: 180 kun yoki siz uni o‘chirguningizcha.
  • Server loglari: 30 kungacha. Yuklama balanslagichi (load balancer) loglari: 90 kungacha.
  • Baza zaxira nusxalari: 7 kun. O‘chirilgan ma’lumot zaxira nusxada shu muddat tugagunicha qolishi mumkin.
  • Muddati o‘tgan kirish kalitlari va kirish so‘rovlari: avtomatik tozalanadi.
  • To‘lov va buxgalteriya yozuvlari: qonun belgilagan muddat davomida.

8. Hisobni va ma’lumotlarni o‘chirish

Hisobni ikki yo‘l bilan o‘chirish mumkin:

  • Ilovada: Profil → Sozlamalar → Maxfiylik → "Hisobni o‘chirish".
  • Ilovasiz: https://mendora.tech/uz/hisobni-ochirish sahifasida, saytga Telegram orqali kirib; yoki team@mendora.tech manziliga xat yozib.

So‘rovdan keyin:

  • Hisob darhol yopiladi.
  • Hisob hamma qurilmalarda tizimdan chiqariladi.
  • 7 kun davomida qayta kirib yoki saytdagi "Bekor qilish" tugmasi bilan so‘rovni bekor qilishingiz mumkin.
  • 7 kundan keyin shaxsiy ma’lumotlaringiz o‘chiriladi yoki shaxssiz holga keltiriladi: ism, telefon, Telegram bog‘lanishi, profil, qurilmalar, buyurtma matnlari, AI natijalari va ularning fayllari, masala rasmlari, DTM mashqlari tarixi, o‘zingiz o‘tkazgan jonli o‘yinlar (o‘quvchilar ismlari bilan), murojaatlar va bildirishnomalar.
  • Qonun saqlashni talab qiladigan to‘lov va buxgalteriya yozuvlari, hamyon tarixi va bonuslar shaxsingizdan ajratilgan holda saqlanadi.
  • Telegram identifikatoringizdan faqat qaytarib bo‘lmaydigan shifrlangan iz qoladi: shu Telegram bilan yangi hisob ochilsa, birinchi buyurtma chegirmasi va do‘st taklifi bonusi qayta berilmaydi.
  • Zaxira nusxalardan ma’lumot 7 kun ichida o‘chib ketadi.
  • Telegram bot bilan bog‘lanish ham uziladi.

9. Bolalar

Ilova 13 yosh va undan katta foydalanuvchilar uchun mo‘ljallangan.

  • 13 yoshgacha bo‘lgan bolalardan bila turib ma’lumot yig‘maymiz.
  • 18 yoshgacha bo‘lgan foydalanuvchilar ilovadan ota-onasining roziligi bilan foydalanishi kerak.

Agar 13 yoshgacha bo‘lgan bola hisob ochganini bilsangiz, team@mendora.tech manziliga yozing. Biz hisobni o‘chiramiz.

10. Xavfsizlik

  • Server bilan aloqa HTTPS orqali shifrlangan.
  • Ilovaga parol ishlatilmaydi: kirish Telegram orqali, kirish kaliti telefonda shifrlangan holda saqlanadi.
  • Masala rasmlari yopiq omborda saqlanadi.
  • Xodimlarning ma’lumotga kirishi vazifasiga qarab cheklangan va qayd etiladi.
  • Pulga oid har bir harakat o‘zgarmas yozuv sifatida qayd qilinadi.

Ma’lumot sizib chiqsa, sizga va vakolatli organga qonunda belgilangan tartibda xabar beramiz.

11. Huquqlaringiz

Sizning huquqlaringiz:

  • ma’lumotlaringiz haqida bilish va ularni ko‘rish;
  • ularni tuzatish yoki to‘ldirish;
  • nusxasini olish;
  • qayta ishlashni cheklash yoki to‘xtatish;
  • roziligingizni qaytarib olish;
  • hisobni o‘chirish.

So‘rovingizni team@mendora.tech manziliga yuboring. 10 ish kuni ichida javob beramiz. Shaxsiy ma’lumotlar bo‘yicha vakolatli davlat organiga ham murojaat qilishingiz mumkin.

12. To‘lovlar

Pullik xizmatlar va hisobni to‘ldirish uchun to‘lov Click to‘lov tizimi orqali amalga oshiriladi. Ilova to‘lov uchun Click sahifasini brauzerda ochadi.

  • Karta ma’lumotlarini faqat Click qayta ishlaydi, ular ilovaga ham, bizga ham kelmaydi.
  • Biz faqat buyurtma, summa, to‘lov holati va hisobdagi balans operatsiyalarini saqlaymiz.

13. O‘zgarishlar

Siyosat o‘zgarsa, yangi versiyasi shu sahifada sana va versiya raqami bilan e’lon qilinadi. Muhim o‘zgarishlar haqida ilova yoki Telegram bot orqali xabar beramiz.

14. Aloqa

  • "NEXT US" MChJ (NEXT US LLC), STIR 313 165 293.
  • Manzil: Sirdaryo viloyati, Paxtaobod, Xalqobod MFY, Chinor ko‘chasi, 67, 120500.
  • E-pochta: team@mendora.tech.
  • Sayt: https://mendora.tech.